وأنت الثرى والسماء .. وقلبك آه أخضر .. وجزر الهوى فيك مدّ .. فكيف إذن لا أحبك أكثر ؟
الاثنين، 29 يناير، 2007,7:25 م
ياترى...كرانيش تسمح؟؟
بأستأذنك..أكتب حياتك ع الورق
إنى أكتبك من يوم ميلادك للنهارده مستحيل
هو إحنا نعرف مستحيل؟؟
هكتب حروف..تشبه عنيكى والكفوف الطيبة
وأرسم فانوس..بينور الليل اللى صاحبه
بدر ناقص منه حته
حته رسيت جوّه منك
لجْل ماتنور ملامحك كلها من غير كسوف
حته دفيت من دفاكى
فاستحلت القلب اللى جايز مش كبير عن السّما
وإزاى يشيل همّك ده كله قلب يبقى مش كبير؟
قلب صاحبى..اللى أنا ساكناه أكيد
مش كده؟ يا بنت حبِّة حبّ
ويّا خاطر.. مستحيل نقولُّه لأ
هو إحنا نعرف مستحيل؟؟
شايفاكى وانت مدمّعه
قدّام مرايتك تسألى
ياربّنا! هو احنا ليه متمزَّعين بالشكل ده؟
هو احنا مش كافى لحياتنا الحب ده؟
هو إحنا...وانت بتسقطى قدّام مرايتك م البكا
ولا تنجدك
ولا يعذرك غير دمعك اللى ملّ من شقِّ الخدود
ومن الحكاوى مع المخدَّه
.وانت نايمه بتحلمى
زمان ... الحلم كان جنه
فِ بيت وعيال بتترمّى
فِ حضن الحب وأحضانك
ودلوقتى ... كابوس دايم بحزن بينهش الدّنيا من الدّنيا وأحلامك
...قلمى بكا
قلمى بكا وأنا بكتبك
تفتكرى كام.. دمعه هتتساقط عشانك؟
أكيد رقم لسه ما عرفوش البشر
اللى بتنطق كل يوم ألف كلمة مستحيل
.... هو احنا
هو إحنا نعرف مستحيل؟؟؟؟؟؟؟؟؟؟؟
 
posted by عين ضيقة | Permalink | 26 comments
الخميس، 25 يناير، 2007,3:44 م
إليك
وشك مش لايق ع الضحكة
وعنيكى الضيقه جدا ...لونها بلون العتمه
وكفوفك..كف تحس الحس وبس
وكف اتشلت من فترة
والناس بتخبط فى جدارك..فيسقط جمر
دنياكى بتلعن دنياكى وبيسب العمر
العمر اللى مطول لسه
وليه؟.........ماأعرفش
 
posted by عين ضيقة | Permalink | 21 comments