From: met-ghamr, dakahlia, Egypt
About me: أىُّ شعرٍ يرتجى أسماءَ بحراً فليحاولَ أن يصوغ الوصفَ دهراً ثمَّ يعلن بعد يأسٍ . . لستُ شعراً
أول كلام العمر كان... مش فاكرة ايه
آخر كلام العمر ممكن يبقى ايه؟
كل احتمالات اللى جاى مش ضدنا
الزحمة شىء مش محتمل
لكنه لسه بيحتمل قلبين دهب فى المركبة
قدس ٌهواك كأننى
لسايا بنت يومين فى دنيا المعصيات والأمنية
الناس شتا ،
الناس ازاز ،
الناس ورق ،
لكنه لسه نهار صبى بيرسم على جبينك غدى
هذا الربابُ على فمى
تسَّاقط الامواج منه لتبعثَ النيلَ انفجارا ًبالهوى
هل تفتكر.. وزن القصيدة بيتكسر؟
أنا أصلى بتزلزل هنا
هنا زى كل اتنين أحبة اتعاهدوا دايما ع الوفا
احنا اتعاهدنا على الدفا
كنا وكان النيل ضما ياحبيبى لاحتمالات اللقاء
والشارع المفتوح لآخره ماكانش فاكر
إن ممكن خطوتك تبقى بحساب
إزاى ماتتقل ع التراب؟
وإزاى تمر بدون زمن؟
وإزاى تقول ((آه ٍ بحبك من زمن))؟
ياغضة القلب الندى!
أنا كنت واخد ع الشقا
على ضمة الشارع لكفى
وقبضة القلب الـ أوى
لساه مغير ااتجاه
كان زى كل الكون هنا مسافر ف موجة
واخدة عهد بالانسحاب
لكنه م اللحظة دى ساب
ع الشط ألفين أمنية
النيل وعدنا يخضَّر البيت القصيدة مايكسروش
النيل بيدخلنا ابتسام
وأنا كنت متعشِّم أضم عنيكى وأبكى
آهٍ لأول مرةٍ نبكى من الفرح سويا
آهٍ لآخر مرة نبكى من الحزن فرادى
إن الفؤادَ يراقصُ الليلَ العطوف
والوقت مش ضد اكتمال المعصية
ولا ضد ألفين أمنية
ولا ضد براءة القلب اللى تاب
ولا ضدنا
ياعمرنا النازف سنين
ياحسنا المستنى حس
اشهد بإن البنت بتحب الوله
اشهد علينا ولفنا
بالفجر والصبح الطهور
(2)
كلهم بيقولوا
كلا كيت كام مرة عشان
مايظهرش الوجع خلفية للمشهد
عشان .. مايصعبش البطل ع الناس
عشان الناس ماتبكيش
مع إنه مخنوق البطل
ومعانده صوت الأغنية
مع إنه لازم يرتمى ف حضن اللى لا بسة الدور دفا
مع إن جواها بيسند ع الصور
مع إنه هادى التتر ، نازل بالبطىء
مع إن كل الناس بكت
مع إنه لسه صغير المخرج أوى
لكنه لسه مصر يتعاد السيناريو من جديد
ومايظهرش الوجع خلفية للصورة
هيحط فوق كتف البطل
تابلوه لزهر الياسمين
لكنه حاير فيها جدا
إزاى ماتظهرش عنين البنت دول الدبلانين؟
التسميات: الجاى أحسن
ذهبت بالأمس إلى حيث كنا نتسلق شجرة التوت التى لديها من العمر أكثر من عمر جد أبى
ذهبت إلى حيث كنا نضحك دون حساب ودون خوف ، نضحك لكل شىء وأى شىء
ذهبت إلى هذا المكان الذى يبقى لى من طفولتى شيئا _ وأنا لا أملك من طفولتى إلا القليل القليل _
ذهبت لأرى من جديد هذه البقعة من الأرض حيث كنا نتسابق ونلهو ونسرق من الدنيا رغما عنها ابتسامات غير محملة بهم
أسمع صوتى الآن وأنا أقلد هذا العصفور الذى يرفض مغادرة الغصن الضاحك من هذه الشجرة التى تحمل اسمى
أشتم رائحة الذرة ونحن نشويها دون علم أبى ، حتما سينهرنا لو علم خوفا علينا من النار ليس إلا.
ههههههههههههههه
وقع ابن عمى الآن من فوق الشجرة ، أحسبه يخدعنى فأضحك جدا ولا أهتم ، لكنه يتألم فعلا ، هنا لا حسابات لشىء سوى الحب
والبراءة التامة وسيل من الدموع لأجله ، هو الآن يتحامل علىّ حتى البيت ، ثم نفكر فى كذبة ونتفق عليها حتى نخبر بها عمى وأبى
نعم .. كنا نجرى فوق سلم البيت لكنه وقع وانكسرت ساقه ، نعلم تماما أنهم سيكذبوننا لكننا نتظاهر بعدم الفهم وبأن هذه هى الحقيقة وما حدث
هو يضحك جدا رغم الألم ، وأنا أضحك جدا رغم الرقباء
ياالله
هنا عشقت القمر هلالا ، أنا لا أحبه بدرا أبدا
هنا تعلمت أن الأمكنة تأخذ منا الكثير
لكن...
بالامس لم أجد شيئا بالمكان
وجدت بنايات تغتصب ذكرياتى ، وجدت الأرض كل الأرض تئن من ثقل دبيب المارة حيث لا زروع سوف تراعى ولا صفاء يستمتع به
ولا أنكر أن المكان لا زال هادئا لكن
هل من حق أبى أن يحرمنى من هذه الذكريات القليلة جدا؟
هل من حق الحضارة أن تجتث طفولتى؟
هل الليل قاس الى هذا الحد الذى يضطرنا لأن نختبىء منه فى بيوت من حديد واسمنت وخشب؟
هل فكر أبى حين يبنى أن لى حقا فى هذا القرار؟
أبى !أنا لا أسامحكم فى محو ابتساماتى التى لا أستطيعها الآن
أنا لا أسامح الليل والناس والخوف الذين قد تبرر لى فعلتك بهم
أنا لا أسامح يا أبى ، لا أسامح.
التسميات: بحبه من زمان وهحبه لكام زمان, لو حاجة يبقى مش أكتر من حالة شعر