وأنت الثرى والسماء .. وقلبك آه أخضر .. وجزر الهوى فيك مدّ .. فكيف إذن لا أحبك أكثر ؟
الاثنين، ٢٩ يناير ٢٠٠٧,٧:٢٥ م
ياترى...كرانيش تسمح؟؟
بأستأذنك..أكتب حياتك ع الورق
إنى أكتبك من يوم ميلادك للنهارده مستحيل
هو إحنا نعرف مستحيل؟؟
هكتب حروف..تشبه عنيكى والكفوف الطيبة
وأرسم فانوس..بينور الليل اللى صاحبه
بدر ناقص منه حته
حته رسيت جوّه منك
لجْل ماتنور ملامحك كلها من غير كسوف
حته دفيت من دفاكى
فاستحلت القلب اللى جايز مش كبير عن السّما
وإزاى يشيل همّك ده كله قلب يبقى مش كبير؟
قلب صاحبى..اللى أنا ساكناه أكيد
مش كده؟ يا بنت حبِّة حبّ
ويّا خاطر.. مستحيل نقولُّه لأ
هو إحنا نعرف مستحيل؟؟
شايفاكى وانت مدمّعه
قدّام مرايتك تسألى
ياربّنا! هو احنا ليه متمزَّعين بالشكل ده؟
هو احنا مش كافى لحياتنا الحب ده؟
هو إحنا...وانت بتسقطى قدّام مرايتك م البكا
ولا تنجدك
ولا يعذرك غير دمعك اللى ملّ من شقِّ الخدود
ومن الحكاوى مع المخدَّه
.وانت نايمه بتحلمى
زمان ... الحلم كان جنه
فِ بيت وعيال بتترمّى
فِ حضن الحب وأحضانك
ودلوقتى ... كابوس دايم بحزن بينهش الدّنيا من الدّنيا وأحلامك
...قلمى بكا
قلمى بكا وأنا بكتبك
تفتكرى كام.. دمعه هتتساقط عشانك؟
أكيد رقم لسه ما عرفوش البشر
اللى بتنطق كل يوم ألف كلمة مستحيل
.... هو احنا
هو إحنا نعرف مستحيل؟؟؟؟؟؟؟؟؟؟؟
 
posted by عين ضيقة | Permalink |


25 Comments:


  • At ١٠:٢٧ م, Blogger بياترتس

    فاتن

     

  • At ١١:٤٢ م, Blogger Aladdin

    أذن مرهفة ... تأخذنا موسيقى الكلام وتعيدنا كأننا نجلس على أرجوحة محببة!

    تكررت كلمة المستحيل والقلب والحب والبكا والدمع، لكن "المستحيل" هو واسطة العقد بين الحب والقلب من ناحية والدمع والبكا من ناحية أخرى.

    كأنك تقولين لذة وألم وبينهما "مستحيل"؟! فإذا كان ثمة حب وألم في حدود "الممكن"، فإن قلباً أودع حباً كحبك "يستحيل" أن تغيب شمسه إلى الأبد، و"يستحيل" أيضاً أن يتحمل ألمه إلا من يستطيعون ذرف دموع بأعداد لا يعرفها البشر!!

     

  • At ١٢:٤١ ص, Blogger syzef

    عيون ضيقة..انت صينية...بس بتعرفي عربي كويس

    مش عارف بصراحة اقول ايه بس انا جيت ابلركلك ع البلوج لقيت الدنيا كلها سبقتني..بس انا عارف المستحيل

    بصراحه واحد قاللي المستحيل هو الخروج من الخانكه وانا صدقته
    مبروووووووك ع البلوج اما القصيده فمش وقتها

    ياتري تسمح كرانيش

     

  • At ٢:٣٨ ص, Blogger كائن العزلة الكئيب

    يا ريت كرانيش تسمح بس عملتيها و كتبتى خلاص
    عالعموم الكتابة طلعت جميلة بس عايز أعرف يعنى ايه متمزعين

     

  • At ٤:٣٩ ص, Blogger Mony The Angel

    أزال أحد مشرفي المدونة هذا التعليق.

     

  • At ٤:٤٤ ص, Blogger Mony The Angel

    to7fa aweeeeeeeeeeeeeeeeeeeeeeeeeee
    bgad esloobek felshe3r y3a2ad
    3agabetny gedan :)
    go on (y)

     

  • At ٤:٤٦ ص, Blogger Mony The Angel

    أزال أحد مشرفي المدونة هذا التعليق.

     

  • At ٤:٤٦ ص, Blogger Mony The Angel

    أزال أحد مشرفي المدونة هذا التعليق.

     

  • At ٤:٥١ ص, Blogger Mony The Angel

    أزال أحد مشرفي المدونة هذا التعليق.

     

  • At ٦:٢٣ ص, Blogger Muhammad

    اول مرة اتشد لقصيدة عامية في بلوج اوي كده .. يخرب عقلك .. بداية مطمنة لحد جاي يكتب, مش جاي يملا صفحات و خلاص

    مش هرغي المرة دي .. بس اكيد هرغي المرة الجاية ان شاء الله

    صباح شريف افنظم

     

  • At ١٢:٤٦ م, Blogger كرانيش

    مش عارفه اقولك ايه يا عيون؟
    بس كل اللى انا عاوزه اقوله ربنا يخليكى ليه
    ويخليكو كلكوا ليه
    انا فعلا بكيت وانا بقرأالقصيده
    بكيت على حالنا اللى اتدهور قوى
    بكيت على المشاعر اللى ماتت
    بكيت على كل حاجه حلوه فى حياتنا مبنقدرش نمسكها لتضيع
    يااااااااااااه
    الحياه بقت وحشه قوى
    قوى يا عيون
    بحبك

     

  • At ١:١٩ م, Blogger 21arestoo

    حلو

     

  • At ١:٢٧ م, Blogger سلامـــــــــــــه

    هو انتي تبعدي عننا يومين تبقي بالحلاوه دي؟!!!!!0
    علي فكره
    القصيده حلوة قوي قوي
    بس عايز اعرف ايه اللي دخل صاحبك في الموضوع؟
    ............

    عزيزتي
    دمتي بود

     

  • At ٢:٢٢ م, Blogger قلب يحترق

    جميل جدا
    بصراحة مكنتش بحب اقرأ العامية نهائي بس بجد اسلوبك جميل

    ربنا يوفقك

     

  • At ٢:٣٢ م, Blogger غادة الكاميليا

    يخربيتك عدوك ابن كارك صحيح
    هى مش حلوة هى جامده
    احساسك بيدلدق على الشاشه قدامى

     

  • At ٤:٤٤ م, Blogger إنسان || Human

    واضح ان الكلام ده مش جديد عليكي....ده عن تمرس..وتمرس مش عادي كمان ..وشكلها كمان كلام كان جوه وطلع مره واحده بدون سابق انذار

     

  • At ٤:٤٤ م, Blogger إنسان || Human

    واضح ان الكلام ده مش جديد عليكي....ده عن تمرس..وتمرس مش عادي كمان ..وشكلها كمان كلام كان جوه وطلع مره واحده بدون سابق انذار

     

  • At ١٠:١٧ م, Blogger عين ضيقة

    بياترس
    شكرا

    علاء الدين
    اهلا بيك عندى
    هو بالظبط كده

    سيزيف
    الله يبارك فيك وعقبال البكارى
    ههههههههههه
    مستنيه رأيك فى القصيده

    كائن العزلة
    متمزعين يعنى والله اعلم :متقطعين (متفرقين بالغصب يعنى)

    مونى
    انت اللى تحفه

    فيريكيكو
    صباح الفل

    كرانيش
    بحبك أكتر والله
    وبعدين الدنيا فيها حتة حلوة مستخبيه دورى عليها

    ارسطو
    شكرا لاسهابك

    سلامه
    قلبها هو اللى صاحبى ياعمنا

    dyin_soul
    آديكى حبيتى العاميه على إيدى........أى خدمة

    غادة
    آه هو بيدلدق

    إنسان
    تصدق؟؟

     

  • At ١:١٧ ص, Blogger Unknown

    ماشاء الله حلوه أوي
    ربنا يخليكو لبعض
    أسلوبك جميل أوي

     

  • At ١:٢٦ م, Blogger الوردة السوداء

    تشبيها تك جميلة اوى

    شايفاكى وانت مدمّعه
    قدّام مرايتك تسألى
    ياربّنا! هو احنا ليه متمزَّعين بالشكل ده؟
    هو احنا مش كافى لحياتنا الحب ده؟
    هو إحنا...وانت بتسقطى قدّام مرايتك م البكا

    حلوة جدا

     

  • At ٢:٣٠ م, Blogger Tamer Nabil Moussa

    كلام جميل مقدرشى اقول حاجة عنة

    فى انتظار الجديد


    تحياتى

     

  • At ٥:٣٥ م, Blogger admelmasry

    اجابة علي سؤالك الاخير فاكيد لا

    اما بالنسبة لشعرك فهو رائع
    تحياتي

     

  • At ٦:٤٧ م, Blogger سلامـــــــــــــه

    فينك يا بنتي بقالك فتره؟؟
    يا رب يكون المانع خير
    .........
    عزيزتي
    دمتي بود

     

  • At ٦:١١ م, Blogger LAMIA MAHMOUD

    واضح اننا منعرفش غير مستحيل .. وواضح اننا متمزعين

    بس طول ما في في حياتنا حد ممكن يكتب قصيدة عننا يبقى مفيش مشكلة

     

  • At ٦:٥١ ص, Blogger FATMA

    اشعارك جميلة أوي و لغتك العربية جميلة اوي انا كان نفسي ادرس عربي

     
إرسال تعليق ~ back home