From: meet-ghamr, dakahlia, Egypt
About me: أىُّ شعرٍ يرتجى أسماءَ بحراً فليحاول أن يصوغ الوصفَ دهراً ثمَّ يعلن بعد يأسٍ . . لستُ شعراً
وأنت الثرى والسماء .. وقلبك آه أخضر .. وجزر الهوى فيك مدّ .. فكيف إذن لا أحبك أكثر ؟
الأربعاء، ٢٨ يناير ٢٠٠٩,٩:٥٩ م
بـــلاش تـــآمـــن
بادئة اتجاهَك خطوتين
خطوتين بادئة اتجاهى .. وربنا مش راضى يرضى
فليه نزولنا م السما اصلا ده كان؟
ورجوعنا ليه مش مستحيل؟
الأوّلة إيه؟
الأوّلة .. فاتح بيبان الغيب
وحده اللى شايف
وحده اللى شايف لون نهار بيقوللنا: ابيض
وحده اللى شايف
وحده اللى شايف حلمنا
بيقوللنا: حلمك معدِّى حدودك الليلة
وحده اللى موجود
واحنا اللى اصلا مش هنا
بيقوللنا : إن البنفسج مش حزين
يانصدقه .. يامانستلمش جوابه تانى
الأوّلة .. كانت
وكانت .. ده احتمال
الدنيا فيها مُؤكَّدين
الـلّـه .. وزحمة حلمنا الشايب
مالت على وش الطريق ، واتبسمت
وقالتلى : غنِّى
قلتلها : فاكِر صوت بكاكى
ولون شريط القطر يوم لما اتقابلنا
وكان كلامى سؤال عن الصبح اللى بادىء دنيتى فيكى
من إمتى صوت القطر كان بيشدنى؟
من إمتى كان القطر؟
عملِتلِى مركب من ورق
وقالتلى : هنسافر
قِبِِلْت
لكنّا ع الشط اختلفنا
يمين الكادر أوسع من شماله
فمين هيتنازل ويرضى لنفسه بالحذف؟
اتفقنا نبقى واحد
التحمنا .. فاحترقنا
بردو ربنا مش راضى يرضى
ثم قلب البنت نازف
راسم الأرض ف دواير
أول الحلقات بتعلن إن مش كافى الشبه بينّا وبين الأرض
مش كافى
عشان .. نخف الخطو
مش كافى
عشان ترضى علينا الأرض يوم نرجع
وف آخر الحلقات بتكسر كبرياءك
بإتلافك .. ويا لون الأرض لونك
واختلافك والسما
ياهل هنسأل
عن ثبوت كل اللى قالولنا انه ثابت؟
وللا هنكمّل حصان الطين،
وعروسة غاب . . بنرسمها ماترسمناش
ونفتح كفنا للبحر
نرسم للطريق النور
من وشم كان فى القلب غاير ، وانفلت
افتح عيونك واصطبر
وإياك تآمن .. إن جرح القلب غاير
وللا وش الليل كئيب
وبلاش تراهن بنت تانى
على ابتسامات البنفسج ضد طعم الناس فى أكتوبر
وبُهتّ ليه لما استجارِت من ثباتك بانهيارها؟
ماكانش ممكن تحتمل
واقع سؤال بكرة اللى جاى عن أوله
وماكانش ملكك أى رد
افتح عيونك واحتمل
القلب مات من جرح غاير
فبلاش تآمن.
