وأنت الثرى والسماء .. وقلبك آه أخضر .. وجزر الهوى فيك مدّ .. فكيف إذن لا أحبك أكثر ؟
الثلاثاء، ٦ فبراير ٢٠٠٧,١١:٢٠ م
تاجى..أقصد تاجينى
أنا وصلنى تاجين ..واحد من هبة, وواحد من كرانيش
وآدى الأسئلة
إيه اللى هيحصل لإيميلك لما تموتى؟
هيستقبل رسايل كتيرة جدا بتقول:إيه أخبارك؟انت فين؟ طمنينا عليكى؟
اديتى الباسوورد لحد قبل كده؟لو(آه) كانت طبيعة علاقتك بيه إيه؟
لأ_ انا ما بحبش أقفل درج وحد يفتحه
اسمك؟
أسماء
اسم الدلع المشهورة بيه وسط أصحابك؟
أنا بستمتع وانا بسمع اسمى منهم زى ما هوّ كده..حقيقى ببقى مبسوطة
عمرك؟
فى 2مايو الجاى هكمل 20 سنة إن شاء الله
برجك؟
اعتقد كدة يبقى الثور, ولو انى عمرى ما حاولت اتعمق فى الابراج دى..تقدرى تقولى عدم اقتناع
مجالك او مجال دراستك؟
انا بدرس اللغة العربية فى كلية التربية, ان شاء الله لما اتخرج هكمّل دراسات اكاديمية
ونفسى أشتغل فى الصحافة
والتدريس هيكون آخر الخيارات,أو خيار مؤقت
شخصيتك نوعها إيه؟
أنا حاليا ..زى ما تقولىكده..فى مرحلة انتقالية
حاجات كتيرة بتتغير فىّ برغبتى وإرادتى
أنا عنيدة شوية,ما بتنازلش عن حقى تحت أى ضغط
أنا إنفعالية شوية وأصحابى شايفين انى ثورية
كمان شايفين انى بحبهم وبخاف عليهم وحنينة -زيادة عن اللزوم
أهلى بقى شايفين انى منعزلة عنهم, ومش مهتمة بأخبارهم وده بيضايقهم
أنا مش إنعزالية بس أنا بحاول آخد قدر من الخصوصية لنفسى وليهم
ببكى كتير ,بس أنا مش نكدية وااه
أنا متفاءلة ومش انهزامية
كمان اجتماعية ومع ذلك بحب أمارس حياتى لوحدى
على فكرة ..أنا طيبة ..بس مش غلبانة
السفر بالنسبة ليكى؟
فرصة للخروج من جو البيت ,وممارسة حياة جديدة فى جو جديد
وقت فراغك بتعملى فيه إيه؟
ياإما بقرأ, أوبكتب, أو قدام التليفزيون أوالكمبيوتر
الأكلة المفضلة ليكى؟
سمك بلطى مشوى, ومعاه طبق سلطة, وعيش سخن
الصفات اللى أخدتيها من بابا؟
الطيبة..بابا طيب فى أغلب الأحيان
الصفات اللى أخدتيها من ماما؟
أعتقد حمل هموم الناس, والبكا كتير
أكتر 6 حاجات بتحبيها؟
أصحابى
الشعر
أحلامى
المشى
شغل المطبخ
عفوا....سقط الشىء الأول عمدا
أكتر 6 حاجات بتكرهيها؟
النهايات
القسوة والتسلطية
الاستسلام
التدخل فى حياتى بدون رغبتى
الخيانة
أفلام محمد سعد
الشغل بالنسبة ليكى؟
اعتقد مصدر للفلوس, وتحكم ذاتى اكتر بمصيرى وحياتى
كمان هو أكيدة وسيلة لصنع حياة أفضل
إيه الكمبيوتر والنت بالنسبة ليكى؟
لحد دلوقتى هو وسيلة بتوصّلنى بيكم, وبتسمح لى أدخل دنيا بحبها
أمرره لمين؟
تقريبا التاج ده راح لمعظم الناس
وانا قررت ما أدبسش حد فيه
______ ______ _______ ________ _______
تاج كرانيش
بتسأل عن 5 حاجات ماحدش يعرفهم عنى
شوفى يا ستى
1_وأنا فى اعدادى كان نفسى احيّى العلم لكن للاسف كان لازم ولد هو اللى يقوم بالعملية دى
2_وانا فى اولى اعدادى كنت امينة الفصل, وفى انتخابات سنة تانية سقطت
وبكيت يومها كتير جدا, استدعيتنى الاخصائية الاجتماعية,وكانت
معتقدة انى مريضة نفسيا
اللى ما تعرفهوش انى كنت ببكى لانى حسيت ان حب زمايلى ليا
قلّ
على فكرة فى سنة ثالثة اختارونى الامينة تانى
3_أنا ما اتعودتش ابوس إيد ماما ,بس فى يوم وهى نايمة بوست إيدها وبكيت
يومها كتير جدا, مش عارفة ليه
4_فى تانية ثانوى , أخدت عدية من أستاذ محمد مصطفى عشرين جنيه
وطلب منى أصرفها أنفع ليا, لكن أنا احتفظت بيها,لحد
ما كنت مع نهلة عند دكتور الصدر واحتاجت فلوس فطلعتها
5_وأنا فى خامسة ابتدائى,كنت برجع من الدرس بالليل وكنا فى الشتا
ومرة قابلت
واحد زميلى ووقفنا نتكلم حوالى ساعة فى الضلمة لأن النور كان مقطوع
كنا أصحاب لحد مادخل حياتنا (العيب واللى مايصحش)بس

(أى خدمة)
 
posted by عين ضيقة | Permalink |


16 Comments:


  • At ١٢:٣٠ ص, Blogger Mony The Angel

    egabatek 7elwa awee ya asmaa2 :)
    w 3agabny awe enek madabesteesh 7ad feltaag :)

     

  • At ٢:٠٠ ص, Blogger غادة الكاميليا

    كنت أتمنى التدبيسه بس يالا
    طبعا الذي سقط سهوا
    طيب سهوا سهوا
    هشوفك قريب؟؟

     

  • At ٢:٣٢ ص, Blogger -_-

    كل تاج وانتي طيبة

    على فكرة المدونة فيها مشكلة في الخلفية البيضاء ممكن تعدليها من التمبليت

     

  • At ٣:٤٦ ص, Blogger الوردة السوداء

    انتى طيبة اوى يا اسماء

    على فكرة انا بحب اسم اسماء ده اوى
    وهقولك بعدين ليه

     

  • At ٣:٥٩ م, Blogger admelmasry

    طب والله كويس انك طلعتي بنت حلال وما دبستيش حد في التاج بتاعك

    وحلو بردة انك بتحبي الشعر

    اي حد يحب الشعر يبقي حبيبي


    تحياتي يا قمر

     

  • At ٨:١٨ م, Blogger bastokka طهقانة

    انت كاتبة الاجابة بالحبر السري؟
    الخط مش ظاهر عندي الا لما اعمل سيلكت


    تعالي شوفي جوزي عامل فيا ايه
    في طهقان و طهقانة

     

  • At ١٢:٤٥ ص, Blogger إنسان || Human

    اللغة العربية .....طب ليه التدريس أخر خياراتك .....دا حتى التعليم في مصر يعتبر متقدم جدا ..على العموم انا اتبسطت جدا على اننا أتعرفنا على شخصيتك أكتر

     

  • At ٢:٤٦ ص, Blogger 21arestoo

    واضح انك هاتدخلي الجنة

     

  • At ٣:٣٧ ص, Blogger rokaaa

    جميل اوى صراحتك المتناهيه
    ومش عارف ليه حاسس ان شخصيتك قويه جدا
    وعلى فكره كنت عايز اقولك على حاجه تحية العلم دى مش حلوه خاااااااالص
    انا كنت امين اتحاد لمدة 7 سنين
    واول سنه نجحت فيها جيت احيى العلم حيته اربع مرات على الرغم ان المفروض 3 بس
    واخدت تهزيء من الناظر انما ايه
    تماااااااااام
    فاحمدى ربنا
    روكى

     

  • At ٤:٠٥ ص, Blogger Unknown

    جميله اجاباتك
    بس ايه يعني بنت, كنت تقوليلهم عايزه أحي العلم, ايه اللي هيحصل يعني(:

     

  • At ٧:٥٨ م, Blogger كائن العزلة الكئيب

    معرفش أعلق أقول ايه الكلام عبارة عن ردود شخصية أنتى حرة فيها
    بس الجميل زى ما قولت لغادة أنى بعرفكم أكتر
    شكرا

     

  • At ١٠:٣٣ م, Blogger عين ضيقة

    مونى
    أى خدمة ياقمر

    غادة
    عمدا ياغادة, تفتكرى أكتر حاجة بحبها..ممكن تسقط عمدا؟
    ما افتكرش

    شرم
    تحت أمرك ياباشا

    الوردة السودة
    أكيد حبيتى الاسم أكتر بعد ما عرفتينى
    ههههههههههه

    آدم المصرى
    مين اللى فتنلك عليا وقالك انى قمر؟
    هههههههه

    باستوكة
    ربنا يعينك عليه يارب

    إنسان
    عقبال ما أعرفك أكتر

    أرسطو
    يارب وانت

    روكى
    الحمد لله ياباشا

    إسراء
    على رأيك

    كائن العزلة
    وعرفتنى؟

     

  • At ١١:٠٨ م, Blogger بياترتس

    تخيلى كنت فاكراكى فاتن طلعتى اسماء أول مره اعرف ان التيجان ليها فايده غير الفضايح
    بس انا سعيده بوجودك معانا أوى يااسماء ومش مجامله ياجميل
    وأتمنى أشوفك قريب

     

  • At ٢:٠٥ م, Blogger كرانيش

    ياه يا عيون وحشانى موووووووووت
    بس زعلت من سقط سهوا
    صحيح احنا اتشغلنا كتير عن بعض الفتره اللى فاتت لكن مش درجه السقوط
    على فكره انا كنت مسافره الايام اللى فاتت دى
    كنت بحاول اغير وشوش واحداث

     

  • At ٥:٥١ م, Blogger عين ضيقة

    بياترس
    متخيلة
    ههههههههههه
    أشوفك على خير يا قمر

    كرانيش
    هى طلبت تعرف 6 حاجات, انا قلت 5 بس
    والشىء الاول اللى هو أكتر حاجة بحبها فى الدنيا
    ما قلتهوش ..ع م د ا
    وبعدين أصحابى غير قابلين للسقوط, لا من قلبى , ولا من حياتى

    أحبك ألف

     

  • At ١٠:٤٦ ص, Blogger كرانيش

    عليه بالفين
    احبك الفين

     
إرسال تعليق ~ back home