وأنت الثرى والسماء .. وقلبك آه أخضر .. وجزر الهوى فيك مدّ .. فكيف إذن لا أحبك أكثر ؟
الخميس، ٨ نوفمبر ٢٠٠٧,٨:١٥ م
ماتقاوحش
إهداء
صديقى ! ياذا المداعبُ حزنَ قلبينا معاً
لننم قليلا بين فصلى الحكايةِ
.فالدورُ أنهكه اكتمال الدور فينا
........
القصيدة
قول ماتقاوحش
الشمس بكرة تهل من إيدى اليمين
قول ياابن مين ؟ .... مايهمنيش
أنا أصلى ماأعرفش الملايكة بالأسامى
أعرف قلوب الطيبين
المرسومين فِ كتاب نصوص الابتدائى
المليانين أحلام وهمّ اللى راسمهم
واللى شاهد ع الوشوش
أطفال شارعنا والصحاب
عمَّال مطابع للحكومة
مايعرفوش اسم الكتاب
رغم إنهم فيه مرسومين
قول ياابن مين
الشمس بكرة تهل من كلمة بحبِّك
يهوانى صبح وبهوى فى عنيكى دى ليل
أو يمكن اتصاحب عليا
أنا أصلى عمرى ف ليلة مااستنيت قمر
ولا عمرى مرة سافرت فى عتاب نجمتين لغياب سنة
أنا بس بهوى الليل فى عينك
ما تقربيش لعنيا صبح عنيا نار
خلينى أحبِّك من بعيد
فأنا البعيدُ المنتظر
أن تنفجر فيَّ الحروفُ وأسطرنَّكِ بين أثوابِ القصيدةِ زُخرفا
أو تسطرينى فى شفاهِكِ
طعمَ قبلٍ مشتهاة
خلِّى المسافةَ بيننا
فالقربُ كالأحلامِ تفسدُ كلَّ شىءٍ دائما
فكما نمارسُ موتنا
فى الحلم نتعاطى التعشُّقَ
وأنا أريدُكِ مرةً لا مرتين
أنا رافضٌ أن أحيا عمرى مرتين
أو أن أحبَّك مرتين
......أو أن أموتَ
أنا قبلكِ متُّ كثيرا
لكنِّى أيضا رافضٌ
الموتَ فيكِ مرتين
خلينى أحبِّك من بعيد
وماتصرخيش وتقولى قول
أنا يوم ما أقول
يوم ما اتقتل
هتعجِّلى ليه بالموات
مع إنه شىء فوق احتمالك؟

التسميات:

 
posted by عين ضيقة | Permalink |


23 Comments:


  • At ٣:٣٥ ص, Blogger نهى جمال

    صديقى ! ياذا المداعبُ حزنَ قلبينا معاً
    لننم قليلا بين فصلى الحكايةِ
    .فالدورُ أنهكه اكتمال الدور فينا
    ----

    أكتر ما أعجبني بشكل كبير هنا المفتتح

    القصيدة بقى عجبني أول مقطع عامي بعد كده وقعت ف باقي القصيدة
    مش عارفه ده بسبب الفصحى اللي دخل ورجع عامي تاني

    ولا ده عيب مني

    بس الاحساس عندي بالقصيدة كان في الاول ووقع بعد كده

    وأه

    ازيك ياسمسم ؟
    عايزه اشوفك عن قريب يابنت لهنكبسو عليكي في الزقازيق وتبقي جيبتيها لنفسك هههه

    يلا سلام ياقمر

     
  • At ٩:٠٤ م, Anonymous غير معرف

    يا الله، لم أكن أتوقع أن ما لديكِ كثير و غزير و رائع و عفوي

    أسعد بكِ دوماً
    كوني في حمى القلب

     
  • At ٩:٢٥ م, Blogger أحمد المصري

    ايه ده ؟..ده كلام جميل جدا ..خاصة حتة قول يا بن مين دي..بس فعلا العربي اللي في النص مشتت للإنتباه..هوا مش وحش ككلام خالص بالعكس ده جميل..بس الترتيب غريب كده أو جديد..مش عارف يمكن عيب مني على رأي نهى..بس فعلا والله قصيدة جميلة جدا..بجد مش مجاملة0

     
  • At ٢:٠٧ ص, Blogger انكسارات .. احمد البوهى

    من تانى بيتشكل حلمك
    .
    .
    حلوة الجملة مع الشكل الجديد للمدونة
    - نسيت اباركلك على الشكل الجديد -
    ــــــــــــ
    وحلوة القصيدة .. هبقى ارجع تانى

     
  • At ٨:٠٣ ص, Blogger الطائر الحزين

    فعلا كل حاجة مرة واحدة
    الحياه الموت الحزن الدفين الالم العميق

    كله واحد مربوط بخيط رفيع لا يراه الا من تذوقة ولا يشعر به الا من مس قلبة


    جميلة
    تحياتى

     
  • At ٧:٥٦ م, Blogger شهر ديسمبر

    انا اصلى ما اعرفش الملايكه بالأسامى
    انا ملاك
    واسمى نمير
    نمير الملاك

     
  • At ١١:١٢ ص, Blogger islam yusuf

    مدونة جميلة
    تحياتى
    على فكرة احنا بلديلت
    عايزين نعمل رابطة للمدونين بالمنصورة
    حلم نفسى أحققه

     
  • At ٨:٥٨ م, Blogger بيتنا القديم

    "ماتقاوحش..."
    تصدقي بالله وماليكي عليا حلفان يا شيخة...طول عمري باسمع الكلمة لكن اول مرة اشوف حد بيكتبها..!!
    عالعموم مش قادر اقيم القصيدة المرة دي ولو ان رأيي فيك انك ملهمة ومبدعة..لكن المرة دي مش عارف اهضم معاني القصيدة فضلاً ان حاسس ان في دربكة ما بين الأبيات وبعضها....
    لو كان تعليقي هيزعلك فبمنتهي الصدق وبصدر رحب ممكن تحذفيه...!!
    تحياتي
    (:

     
  • At ٩:٥٦ م, Blogger عين ضيقة

    نهى جمال
    ياقمر يكفينى حرف واحد يعجبك
    وجايز صحيح الخلط بين الفصحى والعامية سبب الربكة كلها
    ويارب تكبسى عليا فى الزقازيق يااااااااارب


    تيماء
    أقسم أنى لم أسع بتواجد أحد على مدونتى كتواجدك الآن


    أحمد المصرى
    ميرسى ليك وزى نهى كده


    انكسارات
    الله يبارك فيك
    وهستناك تانى


    الطائر الحزين
    أشكرك
    وانت اللى جميل والله


    شهر ديسمبر
    ماشى يانمير


    اسلام يوسف
    أيوة كده حسيت انى ليا ضهر
    يااهلا بيك ياعم
    وان شاء الله نفكر فى حكاية المنصورة دى
    تعالى تانى بقى


    بيتنا القديم
    سمسم باشا وكأنه لسه بيعرفنى النهاردة
    ياباشا الاختلاف على قصيدة انا عارفة انها مش عاليه اوى لا يفسك بين سمسم وسمسم للود قضية
    ومساء الخير بقى


    شكرا لكلكم

     
  • At ٤:٠٩ م, Blogger _ زين_

    التزاوج بين الفصحى والعامية، أو الاقتباس من الفصحى والعودة للعامية، أعتقد أنه محكم للغاية كما أن موضوع القصيدة في بساطته مغري لاستكمال الحكاية.. تتحرك كمل مشاعري مع حكايتك المتأنقة العامية..وأسأل نفسي متى تكمليها فأنا أتعب أحيانا من عبارة "البقية في العدد القادم
    لكي كل احترامي وتقديري

     
  • At ٧:٤٥ م, Blogger كرانيش

    انا عجبنى قوى الانتقال اللى انتى عملتيه ده من العاميه للفصحى
    وبعدين من الفصحى للعاميه

    محسيتش بدروب فى النص القصيده كملت معايا بشكل جيد

    القصيده يمكن من النوع الذاتى قوى يا سمسوم النوع ده اللى مبيتفهمش بشكل كامل او الحكايه مبتاخدش شكلها الكامل عند القارئ الا لما يكون عارف تفاصيل شخصيه اكتر
    وده توقعى لسبب ارتباك الناس من القصيده

     
  • At ٧:٥٠ م, Blogger micheal

    بجد مش عارف أقول ايه
    بس بجد كلام أكثر من رائع
    تحياتي لكي

     
  • At ١٠:٣٥ ص, Blogger Dr. Diaa Elnaggar

    أمال ليه بيقولوا أن الشعر مات وانسحب من حياة الأدب؟

    مش حاقدر غير إني أقولك: شكرا

    "فالقربُ كالأحلامِ تفسدُ كلَّ شىءٍ دائما"

    ايه عمق الفكرة دي وعمق التعبير دا.

    شكرا بجد على هذا النص التأملي الرائع وعلى هذه اللغة الخاصة التي اتحفتينا بها، واسمحي لي أضيفه في دفتر أشعاري المفضلة.

    عميق تحيتي وخالص مودتي

    ضياء

     
  • At ٤:٣٩ م, Blogger goodman

    عجبتنى فعلا
    جميلة رغم عاميتها

     
  • At ٨:٣٩ م, Blogger بياترتس

    اسماء
    فين ايمن .هو ساب البلوج.

     
  • At ١٢:٣١ ص, Blogger شمعى أسعد

    اسلوب رائع وحلو

    مزج الفصخى بالعامية جميل

    وبيقرب المسافة بينهم

    شكلنا كده هنقول

    شمس الشعر بكرة تهل من الزقازيق

     
  • At ٨:٣٧ م, Blogger fawest

    أبعثى لى بإميلك على إميلى
    taha2055@gmail.com

     
  • At ٣:٠٣ ص, Blogger انكسارات .. احمد البوهى

    ياذا المداعبُ حزنَ قلبينا معاًلننم قليلا بين فصلى الحكايةِ .فالدورُ أنهكه اكتمال الدور فينا...

    استهلال يذكرنى بكلماتك ..أىُّ شعرٍ يرتجى أسماءَ بحراً فليحاولَ أن يصوغ الوصفَ دهراً ثمَّ يعلن بعد يأسٍ . . لستُ شعراً

    فكلاهما فى نفس موستوى الابداع والجمال والابهار

    ـــــــــ
    اما عن القصيدة فاحساسها عالى وصعبة وقوية المعنى والاثر

    ــــــ
    لكى التحية

     
  • At ١٠:٢٦ ص, Blogger احساس لسه حى

    عزيزتى
    جميله اوى
    بس انتى بتكتبى من زمان باين
    كلمات عربيه وعاميتها قليله جدا
    واقولك
    طعم الحياه بقه مر
    مفهاش شئ يسر
    حتى اللى حبناهم
    اتملت قلبوهم شر
    تحياتى
    واتمنا اشوف اكتر واكتر
    سلام

     
  • At ١١:١٢ م, Blogger الوحدة بتقتلنى

    بجد بوست لذيذ مووت وحلو اوى انه فيه عامى وفصحى يعنى لكل انواع البشر او للشعراء وعامة الشعب برضه ربنا يوفقك

    شيتوووووووس

     
  • At ٩:٠٠ م, Blogger عين ضيقة

    زين
    كويس ان العمل عاجبك
    بس هو كامل كده مش ليه بقية كده الحالة خلصت

    وتحيات مقبولة طبعا


    كرانيش
    جايز بردو
    وكويس انها عجبتك


    مايكل باشا
    شكرا ياافندم


    د ضياء
    كتير عليا ده والله
    وطبعا اسمح ياافندم
    وانا اطول؟


    جود مان
    ميرسى
    بس ليه رغم عاميتها؟


    بياترتس
    ايمن موجود ياقمر
    مشكلة فى البلوج وتتحل ان شاء الله


    شمعى
    ميرسى ياافندم
    وان شاءالله تهل من عندكم كمان


    فاوست
    حاضر يادكتور
    رغم انى لا اجيد التعامل مع ايميل جوجل
    لكن ... انت تؤمر


    انكسارات
    يارب مايحرمنى من تشجيعك ابدا
    بس هو الجملتين اللى فى البروفايل
    دول بتوع صديقتى كاتباهم لى ويسعدنى اوى انى اكون فى مستواها لأنا شاعرة كويسة جداااااااااااا



    احساس لسه حى
    متشكرة لرأيك ولكلماتك
    تعالى تانى


    شيتوس
    ميرسى ياافندم
    وحلوة لكل انواع البشر دى
    ههههههههههههههه


    شكرا لكلكم

     
  • At ٢:٠٩ م, Blogger Mony The Angel

    َوأنا أريدُكِ مرةً لا مرتين
    أنا رافضٌ أن أحيا عمرى مرتين
    أو أن أحبَّك مرتين......
    أو أن أموتَ
    أنا قبلكِ متُّ كثيرا
    لكنِّى أيضا رافضٌ الموتَ فيكِ مرتين

    خلينى أحبِّك من بعيد
    وماتصرخيش وتقولى قول
    أنا يوم ما أقول يوم ما اتقتل
    هتعجِّلى ليه بالموات
    مع إنه شىء فوق احتمالك?

    huh :|
    (ensana mozbahella)
    ra2e3a ya semsema zay masebtek :)

     
  • At ١٢:٣٥ ص, Blogger rama yar

    u r completely unique delicate and funny as well i'll happy f we become close