أول كلام العمر كان... مش فاكرة ايه
آخر كلام العمر ممكن يبقى ايه؟
كل احتمالات اللى جاى مش ضدنا
الزحمة شىء مش محتمل
لكنه لسه بيحتمل قلبين دهب فى المركبة
قدس ٌهواك كأننى
لسايا بنت يومين فى دنيا المعصيات والأمنية
الناس شتا ،
الناس ازاز ،
الناس ورق ،
لكنه لسه نهار صبى بيرسم على جبينك غدى
هذا الربابُ على فمى
تسَّاقط الامواج منه لتبعثَ النيلَ انفجارا ًبالهوى
هل تفتكر.. وزن القصيدة بيتكسر؟
أنا أصلى بتزلزل هنا
هنا زى كل اتنين أحبة اتعاهدوا دايما ع الوفا
احنا اتعاهدنا على الدفا
كنا وكان النيل ضما ياحبيبى لاحتمالات اللقاء
والشارع المفتوح لآخره ماكانش فاكر
إن ممكن خطوتك تبقى بحساب
إزاى ماتتقل ع التراب؟
وإزاى تمر بدون زمن؟
وإزاى تقول ((آه ٍ بحبك من زمن))؟
ياغضة القلب الندى!
أنا كنت واخد ع الشقا
على ضمة الشارع لكفى
وقبضة القلب الـ أوى
لساه مغير ااتجاه
كان زى كل الكون هنا مسافر ف موجة
واخدة عهد بالانسحاب
لكنه م اللحظة دى ساب
ع الشط ألفين أمنية
النيل وعدنا يخضَّر البيت القصيدة مايكسروش
النيل بيدخلنا ابتسام
وأنا كنت متعشِّم أضم عنيكى وأبكى
آهٍ لأول مرةٍ نبكى من الفرح سويا
آهٍ لآخر مرة نبكى من الحزن فرادى
إن الفؤادَ يراقصُ الليلَ العطوف
والوقت مش ضد اكتمال المعصية
ولا ضد ألفين أمنية
ولا ضد براءة القلب اللى تاب
ولا ضدنا
ياعمرنا النازف سنين
ياحسنا المستنى حس
اشهد بإن البنت بتحب الوله
اشهد علينا ولفنا
بالفجر والصبح الطهور
(2)
كلهم بيقولوا
كلا كيت كام مرة عشان
مايظهرش الوجع خلفية للمشهد
عشان .. مايصعبش البطل ع الناس
عشان الناس ماتبكيش
مع إنه مخنوق البطل
ومعانده صوت الأغنية
مع إنه لازم يرتمى ف حضن اللى لا بسة الدور دفا
مع إن جواها بيسند ع الصور
مع إنه هادى التتر ، نازل بالبطىء
مع إن كل الناس بكت
مع إنه لسه صغير المخرج أوى
لكنه لسه مصر يتعاد السيناريو من جديد
ومايظهرش الوجع خلفية للصورة
هيحط فوق كتف البطل
تابلوه لزهر الياسمين
لكنه حاير فيها جدا
إزاى ماتظهرش عنين البنت دول الدبلانين؟
التسميات: الجاى أحسن
At ١٢:٢٤ م,
At ١١:٤٧ ص, أنا وصاحبى
At ٣:٠٦ م, شيماء الجيزى
At ٧:٣٠ م, أنا وصاحبى
At ١:٥٣ ص, Mony The Angel
At ١١:٣٩ م, أنا وصاحبى
العزيزة عين ضيقة
واضح أنني بقالي كتير ما جيتش هنا، وواضح أنني حرمت نفسي من حاجات برضه حلوة كتير !!!!!
مع إنه لسه صغير المخرج أوى
لكنه لسه مصر يتعاد السيناريو من جديد
ومايظهرش الوجع خلفية للصورة
هيحط فوق كتف البطل
تابلوه لزهر الياسمين
لكنه حاير فيها جدا
إزاى ماتظهرش عنين البنت دول الدبلانين؟
صحيح ، مع إن حياتنا فيلم لسيناريو اختارناه لنفسنا من قبل كده !!!!
عميق تحيتي وخالص مودتي
ضياء
At ٣:٣٨ م, إنسان || Human
شيماء الجيزى
وانت كمان وحشتينى والله
بس انتى عارفة امتحانات بقى وكده
انشاء الله انتى اللى جميلة
تامر نبيل
يارب تسلم انت كمان يارب
مونى
وحشتينى موت وربنا
ربنا يسعد قلبك زى مافرحتينى بتعليقك يارب
موها
أشكرك كتير
وكررى الزيارة
فى حب مصر
يارب الزيارة اللى انا قابلاها دى ماتكونش الأخيرة
د ضياء
غير مسموح بالتأخير تانى ياافندم
انا بس خايفة يفوتك الحلو كتير
ميرسى يادكتور
انسان
ميرسى مرتين
مرة على مرورك ومرة على التج اللى هاخده ان شاء الله
سندباد
تحياتى انا كمان
نهر الحب
أنا كمان سعيدة بيكى جدا
تعالى تانى بقى
أنت وصاحبك
وصلك منى ايميل يارت تقراه
شكرا لكلكم
At ١٠:٢٤ م, sa'7so'7te
At ١٠:٣٤ م, شيمـــــاء
At ٨:٥٥ م, بيتنا القديم
At ٣:٥٠ ص, LAMIA MAHMOUD
ساعات كتير بتخوننا الكلمات...لما بنحب نعبّر عن شيء انتزع الـ(آآه)و(الله) من جوانا..رغم إننا كـ(شعراء..مجازاً) بنقدر نترجم مواقف كتير قوي ع الورق..
لكن بالنسبة ليا..وبعد قراءتي لكلماتك لأول مرة.عجزت عن ترجمة الفرحة والدهة بهذه الموهبة التي ترسم بحروفها سُلّماً موسيقياً خاصاً بها..
أنا سعيد جداً بوجوي هنا لأول مرة...الـ(10) دقايق دول..خرجوني من مودالمذاكرة الرول اللي كنت فيه :D
يمكن..ما فيش وقت..أتكلم فيه عن بعض النقاط في القصيدة من وجهة نظري..بس هانت إن شاء الله..يومين وهاخلص..وأتمنى تقبليني قاريء جديد..
بس كان عندي سؤال فضولي...
محمود البنا ده الشاب الشاعر اللي من الزقازيق؟....لو هوه يبقى كده انا هاتأكد إن الإبداع يجمع المبدعين..في حلقة واحدة.. :)
شكراً ليكي..إلى لقاء..
At ٧:٢٥ ص, أحمد سلامــة
At ٦:٤٩ م, sha3erelgeel
اهلاً بالبنت اللي حاولت تكتشفني
انا اولاً قبل ردي علي العمل
انا عمرو حسن من اسماعيلية
حد غلبان قوي والله
بكتب عامية علي قدي
وباحن للزقازيق مع اني ماباحبهاش
سامحيني
لكن........
انا اتعرفت بالبنا وسمر وايمن
وسمعت عن البعض
وانا سعيد بجو الشعر بينكم اللي انا واثق من ابداعكم فيه
الحاجة التانية
ان الجمال فيكم البعد عن القرب
صورة عجيبة مش كده
يعني انا ماشوفتش حد م اللي انا قولته هنا
وده دليل علي انك شاطرة
وانا سمر كلمتني عنك قبل كده
وطبعاً يشرفني زيارة الزقازيق
وانا وعدت قبل كده بالزيارة قريب
ثالثاً
انسي كل اللي قولته
عشان نتكلم بجد
العمل
أولاً رائع جداًوالمشهد يسطل من الاعجاب
خاصة ولو كان من صوت انثوي
وانا الحقيقة
مش راضي عن العديد من اصوات البنات في مصر
يمكن تكون سمر امام رغم خجلها وسحر البدري رغم موسيقيتها الشديدة
وانتي تقريباً تالت حد يشدني
الصورة واضحة
قوية
هيا ربما تكون حادة شويتين
وناقصة شوية مرونة
او ز ماتقولي كده
حبة نحنحة صغيرة قوي
عشان تسبك الشكل ده
صورة الشتا والقزاز مرعبه
بس حرام عليكي
اضافة الورق
علاقة الشتا بالقزاز
لوحدها دنيا
هتودي اللي بيقرا ف سكة اللي يروح
.....
انا سعيد بيكي
وسعيد ان اسم عمرو حسن ينضم لاجندتك
وانا هاكون في الزقازيق قريب
اسمعكم واسمعّكم ان شاء الله
وممكن اجيب بعض الاصدقاء الشباب
ونعمل يوم
اوعدك انه هيبقي حلو
اشكرك تاني
وربنا يكرمك
ويردهالك في عينك وعافيتك
وحسنة قليلة تمنع بلاوي كتيرة
................
عمرو حسن
بالصدفه لقيت مدونتك
لكن إعجابي بالكلمات دي مش صدفه خالص
ده واقع ملموس
وأنا كنت متعشِّم أضم عنيكى وأبكى
آهٍ لأول مرةٍ نبكى من الفرح سويا
آهٍ لآخر مرة نبكى من الحزن فرادى
إن الفؤادَ يراقصُ الليلَ العطوف
والوقت مش ضد اكتمال المعصية
ولا ضد ألفين أمنية
ولا ضد براءة القلب اللى تاب
ولا ضدنا
ياعمرنا النازف سنين
ياحسنا المستنى حس
اشهد بإن البنت بتحب الوله
اشهد علينا ولفنا
بالفجر والصبح الطهور
الحه دي عاجباني جدا
تسلم ايديكي
تقبلي تحياتي
القصيده اجبرتنى على انى اكملها الجزء التانى جميل جدا
والجزء الاول محتاج اقراه تانى لأنى توهت فيه
تحياتى